Assam : Darkar nga chhung curfew thlahdul Police-te silai hmehpuahah mi pahnih thi

Assam sorkarin Citizenship (Amendment) Bill, 2019 duh lotuten nawrh huaihawta buaina nasa tak a chhuah zui avanga Dibrugarh leh Guwahati-a tiam chin awm loa curfew a puan chu, nimin khan zing dar 8 aṭanga chawhnu dar 1 thleng a thlah dul. 

Ningani khan curfew puan ni chungin mi tam tak kalchhuakin CAB duh lohna hi an lantir chhunzawm a, hmun tam takah buaina a chhuak a ni. Nawrh huaihawtte leh police-te an innawr buai a, police-te silai hmehpuahah mi pahnih an thi a, hliam tuar eng emaw zat an awm bawk. Thite te hi Guwahati-a Lachit Nagar area leh  Hatigaon area-a nawrh huaihawtte zinga mi an ni. 

Diburgarh district-a chief minister Sarbananda Sonowal in leh Dibrugarh MLA Prasatna Phukan in chu nawrh huaihawtten lungin an tawng a, Chabua BJP MLA Binod Hazarika in halsak a ni bawk. Assam State Transport Corporation bus terminus chu hal a ni bawk a ni. Central Assam-a BJP minister Ranit Dutta in bakah, BJP MLA Padma Harzika leh Dabanand Hazarika te chenna in pawh beih a ni bawk. 

Chief minister Sarbananda Sonowal chuan state chhungah boruak ṭha leh ralmuang a awm theihna turin theihtawp an chhuah dawn tih a sawi. Dan leh thupek  kengkawh tura state police-te pui turin state dang aṭang pawhin force an lut tih a sawi. Nawrh huaihawtnaa tharum thawhna chawk chhuaktute chu AASU leh indigenous group-te ni loin, a phena inrawlh mi ṭhenkhat, boruak ṭha lo thlen duhtute an ni, a ti. Heng mite hi zawnchhuah ngei an nih tur thu a sawi. 

AASU-in chaw ngheia nawrh huaihawt 

Hetihlai hian All Assam Stu­dents' Union buatsaihin he Act duh lohna lantirin nimin khan Guwahai-a Chandmari area-ah Assam Engineering Institute (AEI) playground-ah zing dar 6 aṭanga tlai dar 4 thleng chaw ngheia nawrh an huaihawt. 

Krishak Mukti Sangram Samiti (KMSS) hotu Akhil Gogoi chu Ningani zan khan Jorhat-a a in aṭangin man a ni. Official chuan Akhil Gogoi hian CAB dodalna lantira nawrh huaihawt mek chu zawm tura mipuite a fuihpawrh vangin buaina chhuak zel tur venthawn thilah man a ni tih an sawi. Gogi hian Jorhat deputy commissioner office kawtah sit-in protest a huaihawt a, hemi hnu hian man a ni zui ta a ni.