Tripura-ah nawrh titawp lailawk

Tripura-a CAB duh lohna lantira hma la tu ber, Joint Movement Against Citizenship Amendment Bill (JMACAB) chuan nimin aṭang khan nawrh an titawp lailawk.

Chief minister Biplab Kumar Deb chuan JMACAB hruaitute chu an nawrh titawp tura ngenin, union home minister Amit Shah chu an hmuh theihna tura buaipui a intiam hnuah nawrh hi tihtawp lailawk a ni. JMACAB convenor Anthony Debbarma chuan, "Chief minister Deb hmuin CAB leh state chhung dinhmunte kan sawipui a ni. CM chuan home minister Amit Shah kan hmuh theihna turin ruahmanna a lo siam ang tiin min tiam a, hei vang hian kan nawrh huaihawt chu tihtawp rih phawt  kan rel a ni. Home minister kan hmuh hnuah kan hma lak leh zel dan tur chuan kan la rel leh dawn a ni. Home minister hian Tripura chu CAB hian a huam dawn lo tih a lo sawi lo a nih chuan, nawrh huaihawt dan kawng dang kan ngaihtuah ang," a ti. Eng hnam emaw sorkar bik emaw huatna an nei lo a, CAB chu an duh lo tawp tih a sawi.