Tripura : Congress-in Governor hnenah memorandum theh lut

Tripura Pradesh Congress chuan Thawhlehni khan Governor hnenah memorandum an theh lut a, Mahatma Gandhi National Rural Employment Guarantee Act (MGNREGA) thlakna atana VB-GRAM-G Act siam an duh loh thu sawiin, dan thar siam hi sut a nih leh theihna atana inrawlh turin an ngen.

Congress party hian MGNREGA tihtawp a nih duh lohna lantirin Agartala-ah 'Lok Bhavan March' an huaihawt a ni. Kawng zawhte hi Circuit House bulah security mi leh sate'n an lo dang a, a hnuah party hruaitute Raj Bhavan-ah kalin memorandum hi an theh lut a ni.

PCC president Asish Kumar Saha leh AICC member leh MLA Sudip Roy chuan thu sawiin, sorkar laipuiin MGNREGA thlakna tura VB-GRAM-G Act a siam an duh lohna chhante an sawi. He dan thar hnuaiah hian hna thawh tur siamna kawnga sorkar laipui thuneihna tisangin, state sorkar leh Panchayat-te thuneihna tihnep sak an ni, an ti. Hei bakah sorkar lailpuiin sum a tum ṭhin, 90% chu 60% ah a tihniam bawk a, hei hian state sorkar phur a tirit dawn tih an sawi bawk. Scheme hming aṭanga Mahatma Gandhi hming paih a ni chu an duh loh thu sawiin, a tira he dan siamin a tum leh a ngaihhlutte tihnep an tum niin BJP kaihhruai sorkar laipui an puh.

Memorandum-ah hian Parliament-ah Congress party chuan bill hi a dodal a, mahse, pass a ni tho a, hman zui a ni nghal bawk tih an tarlang. Governor hnenah dan thar siam chu sut a nih theihna tura a theihna anga hma la turin an ngen a ni. State mipuite pawhin dan thar siam hi an duh lo a, MNREGA chu hman leh an duh a ni, an ti. Tun hnaia union rural development minister Shivraj Singh Chouhan-a'n VB-GRAM-G Act chungchanga campaign neia an state a tlawh pawhin, Tripura mipuite chuan a rawtna te chu an lo hnawlsak niin Congress hruaitute chuan an sawi.