Priyanka Gandhi-i'n Assam tlawh

Congress Screening Committee Chairperson leh Wayanad MP Priyanka Gandhi chuan nimin khan ni hnih cham turin Assam a tlawh. State assembly inthlan neih tura an party candidate turte tifel turin screening committee meeting a kaihruai nghal a ni.

Gandhi hian Assam a thlen hlimah airport aṭangin Nilachal Hills-a Kamakhyua Temple-ah kalin ṭawngṭaina hun a hmang phawt a, hemi hnu hian Guwahati-a Assam Pradesh Congress Committee headquarters, Rajiv Bhawan a pan a ni. Assam Congress president Gaurav Gogoi chuan Priyanka Gandhi-in an state a tlawh chhunga party hruaitu leh worker-te pawh a tiphur hle tih sawiin, Assam inthlan neih tur chu central lama an party hotute an ngaihpawimawhzia a tilang a ni, a ti.

Member 126 awmna, Assam assembly inthlan hi March-April hian neih a ni dawn a, inthlan neih tur atan hian political party hrang hrang pawh an inbuatsaih chho tawh a ni. Priyanka hi an party candidate thlangtu tur, party screening committee chairperson a ni.

Hetih lai hian Assam Congress party president hlui, Bhupen Borah chuan BJP a zawm a, February 22-ah lak luh a ni dawn tih chief minister Himanta Biswa Sarma chuan a sawi. CM hian Borah hi a chenna inah pawh a tlawh a, darkar khat leh a chanve chuang an inkawm a, a tlawh tukah Congress aṭangin a bang zui a ni. Borah hi kum 2021 -2025 chhungin state Cognress president a ni. CM Sarma pawh hi Congress hruaitu ṭhin niin, kum 2015 khan BJP a zawm a, kum 2021 aṭang khan BJP sorkarah chief minister niin, tun thlengin a la CM chhunzawm a ni.