Meghalaya leh Assam Covid-19 vaccine tur thleng

Kolkata-Guwahati cargo flight hmangin Thawhlehni tlai khan hmarchhak tana Covid-19 vaccine batch hmasa ber chu Lokpriya Gopinath Bordoloi International (LGBI) Airport-ah phurh thlen a ni. He vaccine phurh thlen hi Meghalaya leh Assam state ta tur a ni. 

Airports Authority of India (AAI) chuan SpiceJet (SG 7715) aircraft hmangin Pune aṭangin Kolkata kaltlangin Covishield box 20 chu Thawhlehni tlai dar 4.58 khan Guwahati-ah phurh thlen a ni tih sawiin, box pakhatah hian vaccine hi dose 12,000 zel a awm tih an tarlang. 

Guwahati-a vaccine phurh thlen  zinga dose 36,000 chu Meghalaya ta tur a ni a, Assam dose 2,04,000 a thleng bawk. Vaccine dahna box-te hi Meghalaya leh Assam health department hnenah hlan nghal an ni. LGBI Airport hi hmarchhak bial tana Covid vaccine lo dawnna tur a ni a, airport-ah cargo complex pawh hemi atan hian buatsaihin, cold storage, pick-up point, help desk, exchange point, entry-exit leh sanitisation area-te siam a ni. 

Assam health depart­ment chuan vaccine semchhuah dan turah an inpeih tawh tih sawiin, a hmasaah frontline healthcare, ASHA leh Anganwadi worker mi nuai 1.5 te pek an ni ang. Meghalaya chief minister Conrad Sangma pawhin an state-a Covid vaccine pek chhuah thawh khatna neihna tur hmun 11 tihfel a ni tawh tih a sawi a, state chhung hmun dang rualin January 16 aṭangin vaccine hi an pe chhuak dawn tih a sawi.