2018-a ruihhlo man chungchang chhui nawn leh phut

Manipur-a hmeichhe pawl hrang hrangte chuan kum 2018-a state chhunga ruihhlo tam tham tak man chungchang chu chhui ṭhat leh phutin MP pahnih leh Manipur Legislative Assembly Speaker hnenah memo­randum an thehlut. 

Nikum December 17  khan special ND&PS court chuan ruihhlo man chungchanga thubuai a siamsak, Chandel Autonomous District Council chairman hlui Lukhosei Zou leh mi dang parukte chu thiam a chantir a ni. Court rorel danah hian thil dik tawk lo a awm nia sawiin civil society organisation hrang hrangte chuan na takin an sawisel a, he thubuai hi chhui ṭhat leh ngaihtuah ṭhat a nih theihna tura court sang zawka kal turin sorkar an phut. 

State chhunga hmei­chhe pawl 26 intelkhawm chuan court thutlukna siam danah mipuite an lungawi thei lo tih sawiin, January 8 khan Governor leh Chief Minister hnenah memorandum an lo thehlut tawh a, Manipur Pradesh Congress Committee hnenah pawh memorandum hi pein, hemi chungchang hi eptu party-te chuan sorkar chu sawipui turin an ngen a ni. 

Rajya Sabha MP Leishemba Sanajoaba leh Lok Sabha MP RK Ranjan, Speaker Y Khemchand-te hnena memorandum an thehluh hnuah chanchinthar lakhawmtute an kawm­naah, Nupi Samaj president Nganbi Devi chuan court-in Lukhosei Zou thiam a chantir ngawt dan chu an hrethiam lo a, court thutlukna hi an pawm thei lo tih a sawi.