PM leh Amit Shah-te Assam-ah campaign dawn

Assam assembly inthlan neih tur prime minister Narendra Modi leh union home minister Amit Shah-te chu kar leh hian an campaign-in an kal dawn a, rally te an nei dawn a ni. 

BJP tan an pawl national president JP Nadda chuan campaign bul a lo ṭan tawh a, Thawhṭanni khan Sil­char-a vantlang inkhawm buatsaih campaign hi a hawng a ni. Nadda chuan tun hnaia ram chhung state hrang hranga inthlan buatsaihah BJP chuan hnehna an chan zel thu sawiin, Assam-ah pawh inthlan lo awm turah hian hnehna an chang leh ngei dawn a, Assembly seat 100 chuang an la dawn niin a sawi.  Nadda hian chief minister Sarbananda Sonowal, state BJP president Ranjeet Kumar Das leh party hruaitu dangte pawh kawmin, inthlan neih tura atana hma lak dan turte a sawipui a ni. 

Assam minister leh BJP kaihhruai regional party ṭangrual, North East Democratic Alliance (NEDA)-a convener Himanta Biswa Sarma chuan PM Modi hian January 23-ah an state hi tlawhin, January 24-ah Home Minister Shah chu a kal thung dawn niin a sawi. Amit Shah hian Kokrajhar leh Nalbari-a vantlang inkhawmah thu a sawi dawn a, PM programme neih dan tur erawh tihfel a la ni lo. 

Kum 2016 assembly inthlanah khan BJP hian rorellai Congress party hnehin, Assembly seat 126 awmah seat 60-ah hnehna a chang a,  Bodoland People’s Front (BPF) leh Asom Gana Parishad (AGP)-te nen ṭangrual sorkar an siam a, ṭangrual sorkar hi independent MLA pakhatin a thlawp bawk. Assam assembly inthlan neih hun tur hi tihchian la ni lo mah se, kumin April-May vel hian buatsaih a nih a rinawm.