Assam sorkarin 8th Assam Pay Commission din

Assam sorkar chuan 8th Assam Pay Commission dinin, IAS officer pension Subhash Chandra Das chu chairman atan ruat a ni. He thu hi Finance (Pay Research Unit) Department chuan February 24 khan a puang. 8th Assam Pay Commission hian Guwahati-ah headquarters a nei dawn a, din a nih aṭanga thla 12 hnuah report theh lut tura hriattir a ni.

Commission member secretary atan Secretary of the Finance (PRU) Department chu ruat niin, member dang zingah Personnel Department; ARTPPG Department; Finance Department-a secretary senior-te leh Judicial Department-a LR-cum Commissioner & Special Secretary; Finance (Budget) Department Director leh Gauhati University professor Ratul Mahanta-te an tel.

Commission hian state sorkar hnathawkte hlawh kalphung leh dinhmun a zirchiang dawn a ni. Sorkar hnathawk zingah All India Service officer, degree college, engineering college, medical college, nursing college, Ayurvedic college, pharmacy institute, polytechnics leh institution danga UGC/AICTE/technical pay scale-a hlawh late bakah, Shetty Commission/SNIPC hmanga hlawh la Judicial Service officer-te a huam tel dawn lo thung.

Sorkar thupek chuan Commission chuan hlawh, allowance leh service dinhmun chu diktak leh ngelnghet zawkin siamṭhat a rawt dawn tih a tarlang. Hlawh kalphung thlak danglam dan, economy dinhmun, resource lama state dinhmun, hmasawnna atana thil pawimawh, hnathawhna tihpun, leh Central Pay Commission rawtnate ngaihtuah a ni ang.