Manipur : CM-in PM hnenah hmeichhia chawikan ngai pawimawh turin ngen

Manipur chief minister Yumnam Khemchand Singh chuan Thawhlehni khan prime minister Narendra Modi chu Seva Teerth-a PM office-ah hmuin, state-a sorkar tharin remna leh muanna awm theihna tura hma a lak dan a hrilh a, hmeichhiate chawikanna tur programme hrang hrang ngaih pawimawh sak turin a ngen bawk.

Khemchand hi deputy chief minister Nemcha Kipgen leh Losii Dikho-ten an ṭawiawm a ni. Chief Minister chuan Prime Minister hi a rang lama an state tlawh turin a sawm nghal bawk. Meeting-ah hian CM chuan PM Modi hi state sorkarin Manipur-a buaina thleng mek titawp tura hmalakna hrang hrang a kalpui mekte hrilhfiahin, hnam leh hnam inkara buaina chhuakah rorelna dik leh hunrei tak daih inremna a awm theihna turin theihtawpin hma an la tih a sawi bawk a ni.

Chief Minister chuan Modi chu Manipur a ngaihven vang leh hun hlu tak a pek avangin lawmthu a hrilh a, state-in hma a sawn zel theihna turin a kaihhruaina an mamawh thute a hrilh bawk. CM Khemchand leh Deputy Chief Minister pahnihte hian cabinet tihzauh phalsak turin February 21 khan New Delhi hi an pan a, minister eng emaw zat an hmuh zingah defence minister Rajnath Singh, home minister Amit Shah, finance minister Nirmala Sitharaman, DoNER minister Jyotiraditya M. Scindia leh agriculture and rural development minister Shivraj Singh Chouhan bakah BJP president Nitin Nabin-te an tel.