Nagaland : March 2-ah Assembly budget session ṭan dawn

Nagaland Legislative Assembly budget session chu March 2 hian neih ṭan a ni dawn a, thawh hniha neih a ni dawn tih official-te chuan February 25 khan an sawi.

Assembly Secretariat-in provisional program a tihchhuahah, session hi Governor thusawi hmangin hawn a ni dawn a, a thawh khatna hi March 12 thleng neih tura ruahman niin, sitting vawi nga neih a ni ang. A thawh hnihna neih hun tur pawh puan thuai tura tih a ni.

A thawh hnihnaah hian 2026-27 state budget chu chief minister Neiphiu Rio-a'n a pharh dawn a, sum hmanna tura rawtna awmte sawi ho a ni bawk ang. A thawh khatnaah hian House-ah zawhna chhanna hun, mipui tana thil pawimawh sawi ho, inrelbawlna report leh official document dangte pholan leh committee report tarlante ngaihtuah a ni ang. Sorkar leh private member Bill leh resolution tarlan a ni bawk ang.

A thawh hnihnaah Comptroller and Auditor General (CAG) report ngaihthlak a ni dawn a, receipt leh expenditure thlirletna leh financial year 2025–26 atana grant dilna supplementary demand bakah legislative business dangte ngaihtuah a ni dawn bawk. Kohima leh Dimapur-a Nagaland Liquor Total Prohibition Act, 1989 chu siamṭhatna tura inremna an ziah kalpui dan tur sawi hona pawimawh tak neih beisei a ni bawk.

Assembly hi Frontier Nagaland Territorial Authority (FNTA), state sorkar leh Eastern Nagaland People’s Organisation (ENPO) in inremna an ziah hnua session neih hmasakna ber tur a ni. Hei bakah budget session thawh hniha an neih vawi khatna tur a ni bawk a ni.