Delhi CM-in Arunachal hmeichhiate hmu

Delhi chief minister Rekha Gupta chuan Nilaini khan Arunachal Pradesh hmeichhia Delhi-a cheng, chi leh chi inthliarhranna leh inhmuhsitna ṭawngkam tuartute hmuin, he thil thlenga inhnamhnawihte chu na taka hrem an ni dawn tih a hrilh.

CM Gupta chuan a social media X-ah thuchhuah siamin, Delhi chu mitin lenna a ni tiin, inhuatnain hmun a chang lo tih a tarlang. Hmarchhak bial hmeichhia, chi leh chi inthliarhranna tuartute a hmuh thu leh, thlawpna ṭha tak a pek tur thu a tarlang bawk. Chi leh chi inthliarhranna leh hnam inhmuhsitna thlen ṭhinte lakah khauh taka hmalak a tiam bawk.

Tun hnaiah South Delhi-a Malviya Nagar huam chhunga Arunachal hmeichhia pathum chengte chuan chi inthliarna lam hawia na taka diriam an ni. Anni hian police hnena an thlen hnuah, Delhi police-te chuan hemi kaihhnawihah hian heng hmeichhiate diriamtu Ruby Jain leh a pasal Harsh-te an man tawh a ni.

Gupta chuan Delhi chu mi hrang hrang awmna, inzahtawnna leh dikna chanvo inhumhim sakna hmun a nih thu sawiin, he thil thlenga inhnamhnawih misualte chu na taka hrem an ni dawn tih a sawi. Delhi-ah hian inhuatna leh inthliarhrannain hmun a chang lo tih chu uar taka sawiin, hetiang thil thleng ṭhin hi pawm zam theih a ni lo, a ti. Thil thleng chu politics lama suan lut lo turin a ngen a, zirlaite zahawmna leh an hmalam hun ngaihpawimawh ber a nih tur thu a sawi bawk.