Manipur : CM-in Dinku kawng siam hnathawh enfiah

Manipur chief minister Yumnam Khemchand Singh chuan union road transport and highways minister, Nitin Gadkari nen meeting an neih zawh hnuah state khawpui Imphal-ah letin Dinku kawng siam hna thawh mek chu Nilaini khan a enfiah. Chief Minister hi MLA Thangjam Arunkumar Singh leh senior official-ten an ṭawiawm a ni.

Dinku Road project hmang hian Bamonkampu Dinku Road thawmṭhat leh western leh eastern inkara Inter-State Bus Terminus (ISBT) siamṭhat a ni dawn a ni. Chief Minister chuan quality ṭha hmanga chak taka hnathawh a pawimawh tih sawiin, mipuiin a rang thei ang berin an chhawr ṭangkai thei dawn tih a sawi. Project hi zawhfel a nih hunah inthlunzawmna a tichangtlung dawn a, traffic tawt a tihziaawm dawn bakah zin veivah hun chhung a titlem dawn a ni, a ti.

CM chuan sorkarin state puma infrastructure thuam chak a ngaihpawimawh thu sawiin, mipuite nen thawh hona leh ṭanrualna ṭha neih a ṭul tih a sawi. Union Transport Minister nen meeting an neihah, highway siam leh national highway thuam ṭhat chu ngaihpawimawh sak turin a ngen tih a sawi bawk.