Meghalaya : POCSO thubuaia thiam loh chang kum 25 tang turin hrem

Meghalaya-a South Garo Hills-a Special Court chuan kum 2019-a POCSO thubuaia man, thiam loh chantir chu kum 25 lung in tang turin a hrem.

South Garo Hills superintendent of police, Shailendra Bamaniya-a'n press release a tihchhuahah, he thubuai hi Baghmara Women Police Station Case No. 15(8)2019-ah ziah a ni a, IPC Section 376(2) leh 376AB hnuaiah POCSO Act Section 5(1)(m)/6 hmanga theh luh a ni. Chhuizuina hi WPSI M.K. Sangma kutah dah niin, kum 2019 January 22 khan CS No. 09/19 hmangin thubuai siamsak a ni.

State of Meghalaya vs Chichim D Shira tih thupui hmanga thubuai ngaihtuah zawh a nih hnuah, South Garo Hills, Baghmara court-a special judge (POSCO) Febroneous Silkam Sangma chuan thubuai siamsak chu mi ruk bo, mipat hmeichhiatna hmanpui tura mi rukbo hmang, naupang mipat hmeichhiatna lama nghaisak leh pawngsual thubuaiah thiam loh a chantir.

Kumin February 26 khan court chuan thiam loh chantir hi Section 366 IPC hnuaiah, kum 10 lung in tang tur leh Rs 20,000 chawi turin a hrem. Pawisa hi a pe lo a nih chuan thla thum dang lung in a tan hun chhung pawhsei a ni ang. Hei bakah Section 6 of the POSCO Act hnuaiah kum 25 lung in tang turin leh Rs 1,00,000 chawi tura hrem a ni bawk a, pawisa a pe lo a nih chuan thla ruk chhung lung in a tan hun pawhsei a ni bawk ang.