Meghalaya : CAG-in disaster relief fund hman dik loh Rs vbc 1.07 pholang

Meghalaya-a disaster relief fund hman dik loh chungchang endik mekah, Comptroller and Auditor General (CAG) chuan State Disaster Response Fund (SDRF) aṭangin Rs vbc 1.07, dan loa siam lungalhthei khura chhiatna thleng vanga thi leh hliamte puihbawmna tura tih chu Revenue and Disaster Management Department hnuaiah dik lo taka hman a nih thu sawiin, dan bawhchhiatna nasa tak a ni, a ti.

Kum 2023 audit report February 27-a Assembly neihah, July 2019 khan sum hi pek chhuah a ni tih tarlan a ni. Heng zingah hian Rs nuai 16.50 chu South Garo Hills-a Rongsa khuaa Mengkulgittim-a mitthi 14 leh inhliam pangate pek an ni. Hei bakah Rs nuai 90 chuan East Jaintia Hills-a Ksan lungalhthei khura chhiatna thleng vanga thi 18 chhungte hnenah Rs nuai 5 hisapa pek an ni bawk. CAG chuan relief fund mi 37 hnena pek chu SDRF kalphung kalh a nih thu an sawi. Meghalaya-ah hian lungalhthei khur siam chu kum 2014, April 17 aṭang khan National Green Tribunal in a lo khap tawh a ni.

Department chuan ruahsur nasa vanga tuilian tuarte chhamdawlna atan State Executive Committee (SEC) aṭangin phalna an dil tih an sawi. Mahse, CAG chuan he thu hi hnawlsakin, NGT-in a khap thilah SEC-in thuneihna a nei lo tih an tarlang. Official-te chuan kumin February 5-a Mynsngat-Thangsko-a dan loa siam lungalhthei khur puak vanga harsatna tawk chhungkuate hnena zangnadawmna pek an tiam pawh CAG-in a chhui dawn niin an sawi.