Manipur : CM-in infrastructure leh education project hawng

Manipur chief minister Yumnam Khemchand Singh chuan Pathianni khan Imphal East district-a Moirangpurel-ah hmasawnna project hrang hrang a hawng a, Napet Palli-a kawng thuam ṭhatna tur project liantham a vailiam bawk. Project-te hi infrastructure leh zirna tihchangtlungna atana duan an ni.

Moirangpurel-ah hian Chief Minister chuan Pradhan Gram Sadak Yojana (PMGSY) hnuaia Itham Moirangpurel lei dawh a hawng a, Pradhan Mantri Jan Vikas Karyakram (PMJVK) hnuaia sak Model Residential School a hawn bakah, Samagra Shiksha, Manipur hnuaia din Moirangpurel Higher Secondary-ah Science leh Arts block sak thar a hawng bawk.

Napet Palli-ah CM Khemchand chuan Lamlai aṭanga Thoubal Dam panna kawng NH-202 thawmṭhat hna thawhna tur a vailiam bawk. Project hi NH-202 (Imphal-Ukhrul kawng) leh NH-102 (A) (Shangshak-Tengnoupal kawng) thlunzawmna tur a ni a, Public Works Department enpuina hnuaiah thawh a ni dawn a, kumin chhunga peihfel hman tura ruahman a ni.

Moirangpurel Higher Secondary School-a thu a sawiah, Chief Minister chuan zirna ina zirtirtu indaih lohna a hriatpui thu sawiin, he harsatna sukiang tur hian hma lak a ni dawn a ni, a ti. Moirangpurel kawng dungah dan phal loh thil ti an awm ṭhin tih sawiin, CM chuan chhuizuina nei turin Superintendent of Police a chah bawk. Hei bakah Imphal East Deputy Commissioner chu Laikhong khuaa state buaina avanga chenna in leh lo chhuahsan, internally displaced persons (IDPs)-te dinhmun leh, Direct Benefit Transfer hmanga pawisa la dawng lote report turin a hriattir.