Arunachal : CM-in HPV vaccination drive hawng

Arunachal Pradesh chief minister Pema Khandu chuan chhul hmawr cancer venna, Human Papillomavirus (HPV) Vaccination Programme chu Inrinni liam ta khan Tomo Riba Institute of Health & Medical Sciences (TRIHMS), Naharlagun-ah a hawng. Chief Minister hi health minister Biyuram Wahge leh Health & Family Welfare department official-ten an ṭawiawm a ni.

CM Khandu chuan he hmalakna hi programme pawimawh tak a nih thu sawiin, prime minister kaihhruainaa hmeichhiate hriselna lama hma an sawn theihna tura buatsaih a nih thu a sawi. State mipui,a bikin hmeichhiate chu a lawmpui tih sawiin, hriselna leh hmalam hun ṭha an neih theihna tura hmalakna a ni, a ti. Chhul cancer hlauhawmna tarlangin, kum 2024 khan ram chhungah chhul cancer vei mi 78,500 an awm a, mi 42,000 velin an thih phah tih a sawi bawk.

Programme hian hmeichhia kum 14-15 inkar a huam a, tun dinhmunah state-ah hian hmeichhia 19,500-te chu vaccine la tura tihchian an ni tawh. State sorkar chuan thla thum chhungin an ruahmanna zawhfel an tum a ni. Cancer natna chu vaccine hmanga ven theih a ni a, dose vbc 50 vel chu khawvel pumah harsatna lian tham awm loa pek chhuah niin, a him tawk a ni tih Khandu chuan a sawi.