Congress hruaitu ten ngaihdam min dil : Rijiju

Union Minister of state for home Kiren Rijiju chuan Congress MP leh hruaitu ṭhen-khat ten dik lo taka an puh hming-chhiat avanga a lakah ngaih-dam an dil thu a sawi.

Union minister Kiren Rijiju chuan, Arunachal Pradesh hydro project-a eirukna thilah inhnamhnawihna neia Congress party-in an puh chu thu dik lo a nih thu sawiin, mimal intih hmingchhiat tumna a ni, a ti. Dik lo taka inpuh hmingchhiatna avang hian, thil sual titute zingah ngaihdam min dil an awm a ni, a ti. Rijiju chuan a Twitter-ah, "Pathian hi a ngilnei tak zet a ni, Congress MP leh hruaitu
ṭhen-khat-te'n an thil tih dik loh avangin ngaihdam min dil" tiin, a tarlang. Hetihlai hian amah ngaihdam diltute hming erawh a tarlang lo thung.

Arunachal Pradesh-a cheng vaibelchhe 450 senna tur hydro-project kalpui mekah Rijiju hi eirukna thilah inhnamhnawia puh niin, a laina hnai tak pakhat uchuak taka duhsakah puh a ni. MoS Rijiju-a eiruk thila inhnamhnawiah puh a nih avang hian Parliament thlasik ṭhut khawmah pawh eptu party-te chuan minister chu insawi fiah tura phutin an au buai a ni. Eptute chuan Rijiju chu a nihna aṭanga bang tura an phut thu te sawiin, eirukna thila fihlim lo minister an duh lo thu te an sawi a ni. Hetihlai hian Congress chhungkaw zingah Rijiju-a thlawptu an awm nia sawi a ni bawk.

Rijiju hi Arunachal-a hydro-power project thawh mekah, a laina hnai tak contractor hnena sum pe chhuak thuai tura Power Ministry-ah ngenna lehkha thawnah puh a ni bawk. He thilah hian Union Power Minister Piyush Goyal chuan, Union Minis-ter of state for home Kiren Rijiju-a'n ministry-a ngenna a theh luh hma hian sum pek chhuah a nih thu a sawi ve bawk.