Manipur : Remna leh muanna a awm theih nana hma la turin MLA-te ngen
Manipur legislative assembly speaker Th Lokeshwar Singh chuan state chhunga hnam hrang hrangte inkarah remna leh muanna a awm theih a duh thu sawiin, he mi atana hma la tur hian MLA-te chu a ngen tih a sawi.
Assembly speaker Th Lokeshwar Singh chuan, "MLA-te chu remna leh muanna a awm theih nana hma la turin ka ngen a, an bial ṭheuha in tinah kalin remna leh muanna a awm theih nana beihpui thlak turin ka ngen a ni" a ti. Bial hrang hrangah remna leh muanna a awm chuan state pumah remna a awm mai dawn a, chumi tur chuan bial tina MLA-te'n hma an lak a ngai a ni, a ti. Hnam bil anga hamṭhatna neih tum chu thil dik lo a nih thu sawiin, hnam hrang hrangte chu mahni hamṭhatna chauh ngaihtuah lo a, state pum ṭhatna tur ngaihtuah tura a duh thu a sawi.
Assembly speaker chuan harsatna an tawh mek sukiang tura ṭanrual a ngaih thu sawiin, party bil emaw hnam bil anga inlak hran hun a ni lo, a ti. Remchanga hmanga politics-a ham-
ṭhatna lo zawn chu thil tihchi loh tak a ni tih sawiin, buaina chingfel tura party hrang hrangte ṭanrual a ngaih zawk thu a sawi. Mi ṭhenkhat kawhmawh bawl avanga civil mi pawisawilote chunga tawrhna a thleng fo ṭhin chu a dem thu Singh chuan a sawi bawk.
Hetihlai hian Communist Party of India (CPI), Manipur state council secretary Dr M Nara pawhin sorkar laipuia Bharatiya Janata Party (BJP) Minister-te chu Manipur-in tualchhung buaina a tawh chhung chu an state tlawh tawh rih lo turin a ngen. Nara chuan Union Minister-te'n Manipur an tlawhin tualchhung buaina chingfel turin hmalakna an nei ngai lo niin a sawi a, mipuite leh state sorkar harsatna belhchhahtu mai an ni, a ti. Minister-te chuan vote bak an zawng lo a, inthlan lo awm tura party tana campaign mai an ni, a ti. Manipur governor chu tulachhung buaina chinfel a nih thuai theih nana chak zawka hma la tura a duh thu sawiin, mipuite chu sorkar hmalakna thlawp turin a ngen bawk.
Manipur hian tualchhung buaina a hmachhawn mek a, pawl eng emaw zatin hmun hrang hrangah nawrh an huaihawt a ni. United Naga Council-te'n November 1 aṭanga chakkhai lamna kawngpui pawimawh, National Highway an dan chhah avangin buaina hi a inṭan. UNC-te'n hun rei tak chhung NH an dang chat chu pawl hrang hrangte chuan an dem thu sawiin, tawpsan turin an ngen a, mahse tun thlengin kawngpui dan hi kalpui a la ni. Tunhnai khan Imphal East district-a nawrh huaihawttu ṭhenkhat ten lirthei eng emaw zat an hal avangin buaina a chhuak thar leh a, Imphal East district-ah hian curfew puan a ngai hial a ni.