Meghalaya : CM-in tourism thuam chakna tur puang

Meghalaya chief minister Conrad K. Sangma chuan state-a tourism thuam chakna tur project lian tham tak tak puangin, hnathawh tur a pun dawn bakah tualchhung economy a tichak dawn tih a sawi. Project thawh tur lian thiam zingah hian New Shillong-a Mawkhanu huam chhungah Monolith Towers sakna tur pawh a tel.

Monolith Tower-te hi metre 123 a sanga sak tura ruahman a ni a, Statue of Unity zawha ram chhunga tower sang ber pahnihna a ni dawn a ni. Chief Minister chuan tower-ah hian lift, chaw eina hmun leh circular glass viewing deck a awm dawn a, a chhehvel tlang mawi tak takte a thlir theih dawn tih a sawi. Sangma chuan project chu Burj Khalifa nen khaikhinin, cutting-edge system hman a ni dawn tih a sawi bawk. Ruahmanna an siamah state chanchin, hnam ziarang leh culture heritage pholang thei laser hmangin tih lan a ni dawn tih a tarlang.

CM Sangma chuan tlawhtute chuan visual technology changkang tak, light display leh digital storytelling hmangin hnam ziarang an en thei dawn a ni, a ti. Monolith Tower Complex lian zawk chu INI Design Studio duan niin, ram acre 214 vela zaua siam a ni ang. Project hi tourism, culture, leh leilung leh a chhehvela thil hrang hrang inzawmkhawmna hmun (integrated space) anga duan a ni.

Official-a ruahmanna an siamah, helai hmunah hian thil pawimawh tak tak pholanna themed exhibition zone panga dah a ni dawn a, chung zingah chuan ruahtui tlak dan, cave system, living root bridge, khua leh tuite, leh biodiversity-te pawh a tel. Tower pahnih thlunzawmna metre 72-a thui sky bridge, restaurant leh tlawhtute mamawh a awm dawn bawk.

Meghalaya hian state-a tourism lam chawikanna turin PM-DevINE scheme hnuaiah Rs vbc 233 a dawng dawn a, hemi hmang hian amphitheatre leh infrastructure te siam a ni dawn a ni. Chief Minister chuan khualzin thlen thei turin state chhung hmun hrang hrangah homestay 1,000 dawn siam thar a ni tawh a, a dang 3,000 siam belh tum a ni bawk tih a sawi. State sponsor event hrang hrang kaltlanga tualchhung artist-te chawi lar tum a ni a, hemia tan hian grassroot music leh performing arts lam pawh ngaih pawimawh chhoh zel a ni dawn a ni, a ti.