Assam: Nawrh huaihawtnaah mi panga thi tawh Sokar hnathawkten CAA duh lohna lantir dawn

Citizenship (Amendment) Act duh lohna lantira Assam state-a nawrh huaihawtnaa hliam tuar mi pakhat chu nimin khan a hliam tur loin a thi ve leh a, ani nen hian CAA duh lohna lantirnaa thi zat hi mi panga an tling tawh a ni. 

Nimina a hliam tuar loa thi hi Udalguri district-a Tangla khuaa cheng, kum 25 mi Iswar Nayak a ni. Kar liam ta Nilaini khan Guwahati-a Downo Town area-a Citizenship (Amendment) Bill duh lohna an lantir ṭumin a hnung lam aṭangin kah a ni. Downtown Hospital-ah kalpui nghal niin a hnuah Guwahati Medical College and Hospital (GMCH) sawn a ni a, mahse nimin khan a hliam tuar loin a thi ta a ni. 

Nawrh huaihawtte leh police-te innawr buainaa police-te silai hmehpuahah Lachit Nagar area-ah Dipanjal Das a thi a, Hatigoan area-ah kum 17 mi San Stafford chu kahhlum niin, Basistha are leh Tinsukia district-ah mi pakhat ve ve an thi bawk. 

Assam DCP Bhaskar Jyoti Mahanta chuan police silai hmeh­puah vang hian mi 25 velin hliam an tuar a, nawrh huaihawt leh security force-te innawr buainaah midang 50 velin hliam an tuar bawk tih a sawi. State chhung hmun hrang hranga tharum thawhna thleng kaihhnawihah mi 85 man an ni tawh niin a sawi. 

Assam state sorkar hnuaia hnathawkte chuan December 18 hian CAA an duh lohna lantirin hna an thawk dawn lo. Sadou Asam Karmachari Parishad (SAKP) President Basab Kalita chuan state chhung hmun hrang hrangah sorkar hnathawkte chuan he nawrh hi an zawm vek dawn tih a sawi. Nikum May thla khan Joint Parliamentary Commi­ttee (JPC) in an ngaihdan a zawh ṭum pawhin,  Citizenship (Amendment) Bill an duh loh zia chu chiang takin an lo hrilh tawh tih Kalita chuan a sawi. He dan hi sut a nih hma chuan an dodal zel dawn tih a sawi bawk. 

CAA duh lote nawrh huaihawt vanga tharum thawhna a thlen hnuah Guwahati-ah hian kar liam ta Nilaini aṭang khan tiam chin awm loin curfew puan a ni. Mahse nimin khan zing dar 9 aṭanga tlai dar 6 thleng curfew hi thlahdul a ni. 

East Dibrugarh, West Dibru­garh, Naharkatiya, Tengakhat leh Chabua revenue circle-ahte curfew hi zing dar 7 aṭanga tlai dar 4 thleng thlahdul a ni bawk a, Tingkhong leh Moran revenue circle-ah zing dar 7 aṭanga chawhnu dar 1 thleng thlahdul a ni bawk. 

Eptu party Congress leh All India United Democratic Front (AIUDF) chuan Assam Assembly Speaker hnenah CAA vanga an state-in buaina nasa tak a tawh mek chungchang sawiho tura special session ko turin an ngen. 

Assembly-a Leader of Oppo­sition Debrata Saikia, Congress MLA chuan Speaker Giten Goswami hnenah, "Lok Sabha-a Citizenship Amendment Bill, 2019 pass a nih aṭanga buaina awm chhoh dante chu i  hre ve ngei ang. Rajya Sabha-a pass a nih leh hnuah phei chuan buaina a punlun zual a, state chhung hmun eng emaw zatah curfew puan a ngai ta hial a ni," a ti. CAA hi hman a nih hnuah an state nihphungte a danglam theih tur thu leh, Assam mite chuan anmahnin ram ngeiah duhthlanna siam theihna an neihte pawh an hloh thei a ni tiin, hemi chungchanga hi Assembly-a sawiho leh a ngai a ni, a ti.