Meghalaya : CM-in police lak tharte hnenah appointment letter pe chhuak

Meghalaya chief minister Conrad K Sangma chuan March 5 khan Meghalaya Police lak thar mi 3,000 vel hnenah appointment letter a pe chhuak. Tura-a programme buatsaiha thu a sawiah, CM Sangma chuan state chanchina ṭum khata appointment letter sem chhuah tam ber ṭum a nih thu tarlangin, hna lak dan chu langtlang taka kalpui niin a thiam leh tlingte chauh lak an nih thu a sawi bawk.

Chief Minister chuan hna lak runpui buatsaihah hian diltu nuai 1.7 chuang an awm tih sawiin, an zing aṭanga tling 3,000 vel thlan chhuahte hnenah appointment letter pek a ni chu police department tan ni ropui tak a nih thu a sawi. Official-te chuan hna lakah hian police force-a technical leh service-oriented position hrang hranga hna ruak 2,968 a huam tih an sawi. Post hnawhkhah zingah Armed Branch Constable leh a kaihhnawih 1,494 an awm a, Unarmed Branch Constable 720, Multipurpose Response Operator 205 leh firemen 195 an awm bawk. UBSI, Driver Fireman, Driver Constable, operator leh mechanic pawh lak tel an ni.

Sangma chuan police-te chu dan leh thupek kengkawh turin mawhphurna sang tak an nei tih tarlangin, dan leh thupek tel loin hmasawnna a awm thei lo tih a sawi. Police lak tharte chu mahni inthununna leh dikna vawng nung turin a chah a, sorkarin police force thuam chak zel a tum tih a sawi bawk.