Nagaland : NPF-in institution-a Vande Mataram sawi tir tum duh lo

Naga People's Front (NPF) chuan sorkar laipuiin zirna in hrang hrang bakah state Assembly-ah Vande Mataram chham rual ziah tura a tih chu an duh lo thu sawiin, hei hi Kristian tamna Nagaland-a an sakhaw rinna leh culture tan a him lo tih an sawi.

NPF chuan thuchhuah siamin, Vande Mataram sawi chhuak tura tihluih chu India ram danpui hnuaia fundamental rights leh duties a tarlan nena pawh inmil lo niin a tarlang. An state mipuite sakhua leh culture, Constitution-a Article 371 (A) in a venhimsakna dinhmun pawh a tiderthawng thei a ni, an ti. State nunphung leh mipui tam zawk rin dan nen, Vande Mataram sawi ngei ngei tura intih chu thil inmil lo tak a nih thu an tarlang.

Vande Mataram ah hian Hindu pathiante chungchang sawina a awm a, hei hi Kristiante rin dan nena inkalh a ni an ti. Hei vang hian sorkar laipui hnenah India ram chu sakhaw tin zalenna ram a nihna chu zah a, a thupek siam tawhte ngaihtuah ṭha turin an phut tih an sawi.