Meghalaya : Police-ten ruihhlo Rs vbc 51 man hu man

Meghalaya police-te chuan East Jaintia Hills district-ah ruihhlo Rs vbc 51 chuang manin, hemi kaihhnawihah hian mi pahnih an man tih official-te chuan March 7 khan an sawi. Hei hi ṭum khata ruihhlo an man tawh zinga tam tham ber a ni.

Heng ruihhlote hi police leh Anti-Narcotics Task Force (ANTF) ten Ratacherra huam chhunga March 6-a naka-checking beihpui an thlaknaah an man a ni. Police-te chuan motor mi pathum chuanna chu tidingin,an endik hnuah ruihhlo tam tham tak hi an man tih an sawi.

Police officer-te chuan sahbawn bawm 19-a heroin nia rinhlelh gram 203.7-a rit chu motor-a chuang pakhat hnen aṭang hian an man a, passenger dang pakhat trolley bag aṭangin ram chhunga khap crystal methamphetamine tablet nia rinhlelh gram 10.145 bawr vel an man bawk. An pahnih hian man zui nghal niin, police-te chuan an mi mante hi interstate leh cross-border drug trafficking network-a thawk an nih rin thu an tarlang.

Anti-Narcotics Task Force hotu Vikash Kumar chuan an ruihhlo man zawng zawng chu Rs vbc 51.13 man vel a nih thu a sawi. An mi mante hi Mizoram-a cheng an nih thu sawiin, chhuizuina neih chhunzawm zel a ni dawn tih Kumar chuan a sawi. ANTF police station-ah thubuai ziahluh nghal a ni a, thuneitute chuan ruihhlo tawlhruknaa inhnamhnawih dang man tumin hma an la zui zel a ni.