Sorkarin Imphal rel project zawhfel a nih thuai theihnan hma a la : Manipur CM

Manipur chief minister Yumnam Khemchand Singh chuan, state sorkarin Imphal aṭanga national rel network thlunzawmna tur rel project thawh mek chu zawhfel thuai a nih theihna atan a ṭul angin hma a la zel dawn tih a sawi.

Imphal leh Jiribam khua thlunzawmna tura rel kawng siam tur hi Assam-a Cachar district ramri bula awm a ni a, km 111-a thui niin Rs vbc 22,000 chuang senna tur a ni. Kum 2028-ah chuan rel kawng hi hman ṭan theih beisei a ni. Chief Minister chuan Northeast Frontier Railway official-te leh general manager (construction, Maligoan) Ashish Bansal-te nen Chief Minister Secretariat-a Zirtawpni zana meeting an neih zawhah rel kawng zawhfel thuai a nih theihna tura sorkar hmalakna hi a tarlang a ni.

CM Khemchand chuan meeting-a an thurelte a social media-ah tarlangin, Imphal thlunzawmna tura rel kawng siam hna kalpui meka hmasawn dante an hrilh hriat thu a sawi a, state-a infrastructure project pawimawh ber zinga mi a nih thu a sawi. Rel kawng siam chuan state transport infrastructure a thuam chak dawn a, ram chhung hmun hrang hrang tlawhpawhna a tihchangtlun dawn bakah, supply chain rintlak leh him zawk an nei thei dawn tih a tarlang.

Rel kawng project chu zawhfel thuai a nih theihna turin sorkarin a ṭul apiangah puihbawmna a pe dawn a, state mipui tam takin an chhawr ṭangkai dawn tih a sawi. Imphal-Jiribam rel project hian intlawhpawhna mai bakah, economy hmasawnna kawngah nasa takin a pui dawn tih a sawi bawk.