Nagaland : International Women's Day hmang

Nagaland pumah Inrinni khan International Women’s Day lawmna hun hman niin, hmeichhiate zinga an state tana thawhhlawk tak takte chawimawina hun hman a ni. He hun hi Kohima-a Capital Convention Centre-ah "Rights. Justice. Action. For All Women and Girls" tih thupui hmanga hman a ni.

Khuallian Environ­ment, Forest and Climate Change minister C.L. John chuan he ni hi hmeichhiate inpekna, hlawhtlinna leh harsatna tam tak an paltlangte hriatpuina hun a ni, a ti. State-a hmeichhiate chu zirna, civil service leh hna hrang hrangah hlawhtlinna an neih chhunzawm zel a, chhungkua leh khawtlang tana mi pawimawh tak an nih thu a sawi.

Naga hmeichhiate politics lamah mi pawimawh pawh an pung zel tih sawiin, John chuan tun dinhmunah state-ah politics lamah hmeichhe aiawh pahnih an awm a, hei hian hmeichhe hruaitute rinna a tipung tih a sawi. Remna leh muanna bakah khawtlang nun siamṭhat kawnga Naga Mothers’ Association-te chanvo pawimawhna a tarlang. Hmeichhiate chu huaisen takin an thil tum tipuitling turin a fuih bawk.

Social Welfare Department adviser Wangpang Konyak chuan an thupui chu dikna chanvo humhalh, hmeichhia leh kum la naupang zawkten harsatna an tawh ṭhin sutkianna tur leh, intluktlanna bakah hun ṭha an neih theihna tura ruahman a nih thu a sawi.