Assam : CM-in Maharaj Prithu flyover hawng

Assam chief minister Himanta Biswa Sarma chuan Guwahati-a Maharaj Prithu (Noonmati-Dighalipukhuri) flyover chu nimin Thawhlehni tlai dar 5 khan a hawng. Flyover sak hna hi kum hnih leh a chanve vel thawh niin, Rs vbc 850 an seng a, hmarchhak biala thui ber leh man to ber a ni. A thawktu, construction company engineer Mahmud Rahman chuan flyover chuan lirthei tawt lutuk a tiziaawm dawn tih a sawi.

Km 4.5-a thui flyover hi Public Works Department hnuaiah Gautam Construction Company Limited leh, Anupam Nirman Private Limited-te chuan an sa a ni. Project hi kum thum chhunga sak zawh tura ruahman ni mah se, thla 28 chhungin an peihfel hman a ni. Rahman chuan flyover dunga Chandmari-a rotary point-ah Assam hnam ziarang pholan a nih tur thu sawiin, hna pawh thawh mek a ni, a ti.

Namrata Agamcharya chuan flyover cheimawi hna an kalpui vawikhatna a nih thu sawiin, thing ṭiak 4,000 vel phun a ni dawn tih a sawi. Tualchhung ṭhalaiten hmasawnna project-a an tha nasa taka an thawh chu lawmawm a tih thu a sawi bawk.

Kumin January 29 khan CM Sarma chuan, Guwahati-a flyover liantham sak mekte chu April 14-ah peihfel hman a ni dawn tih a lo sawi tawh a ni. Project endikna neih a nih hnuah Sarma chuan flyover chu thawh hniha hawn a ni dawn tih sawiin, a thawh khatna chu February 28 khan hawn a ni. Flyover hi lirthei ke pahnih nei tlanna atan hawn hmasak a ni a, mipui nawlpui hman theih tura tih a ni leh thuai dawn a ni.