Meghalaya : West Garo Hills-ah curfew puang

Meghalaya-a West Garo Hills district thuneitu chuan, Garo Hills Autonomous District Council (GHADC) inthlan lo awm turah non-tribal candidate an awm avanga buaina chhuak tur venna atan district pumah curfew a puang. District magistrate Vibhor Aggarwal chuan curfew hian nimin chhun 12 aṭanga vawiin chhun dar 12 thleng a huam dawn tih a sawi.

Administration chuan an hmalakna chu district-a dan leh thupek kenkawhna atan a pawimawh tih a sawi. Thuneitute chuan lirthei tlan dan thleng tibuai thei buaina a chhuak thei tih sawiin, hei hian nunphung pangngai tibuaiin mipui tan harsatna a thlen theih thu an tarlang. Official-te chuan venhimna kalpui a nih loh chuan remna leh muanna dinhmun a chhe thei a, vantlangah buaina a chhuah theih bakah, inhliam, bungraw tih chhiat leh tualchhung buaina a chhuak thei tih an sawi.

Curfew hi Bharatiya Nagarik Suraksha Sanhita (BNSS) Section 163 hnuaiah puan a ni. Thupek hnuaiah hian phalna nei loa kawngzawh, mi panga aia tam awmkhawm, ralthuam leh a kaihhnawih kente khap a ni. Thuneitute chuan dan zawm lote chu Bharatiya Nyaya Sanhita (BNS) Section 223 leh a kaihhnawih dan hnuaiah hrem theih an nih thu an tarlang.

He buaina hi tun hnaia Garo Hills Autonomous District Council-in council inthlana ding tur candidate-ten nomination paper an theh luhah Scheduled Tribe (ST) certificate theh lut tura hriattirna a siam vang a ni. He hmalakna hmang hian non-tribal candidate-te chu inthlana an din khap a ni.