Meghalaya : CM-in hmun danga insawn chhuak tura tihna a hnawl

Meghalaya chief minister Conrad K Sangma chuan Garo Hills-a buaina chhuakah a chenna in chu beih tel mai hlauhthawnawm nia information dawngin, hmun him lama insawn chhuak turin thurawn dawng mah se insawn a tum lo tih a sawi.

Garo Hills Autonomous District Council (GHACD) inthlan neih tura nomination paper theh lut zingah non-tribal a awm avangin tribal leh non-tribal inkarah buaina nasa tak a chhuak a, Thawhlehni khan buaina chhuakah mi pahnih an thi a ni. Garo Hills huam chhunga district pangaah Nialini khan mobile internet service tihtawp a ni a, West Garo Hills leh East Garo Hills district-ah curfew puan a ni bawk.

Video kaltlanga thuchhuah a siamah, CM chuan pawl leh mimal eng emaw zat chuan Tura-a an chhungkaw chenna tihchhiat tum leh, a chhungte beih tuma an pan tih hrilh a nih thu a sawi a, hei vang hian security-te chuan Chief Minister leh a chhungte chu hmun him zawka insawn turin an ti a ni. Mahse a chenna inah hian an awm zui zel a, a hlauh loh thu leh buaina thleng mek chu a hmachhawn dawn tih a sawi. Pathian kutah a innghat a, state mipui tan a inpe chhunzawm zel dawn tih CM chuan a sawi.

Chief Minister chuan tun hnaia buaina thleng mek chungchang sawilangin, hmun hrang hrangah bungrua intihchhiatsakna te thlengin, sorkar building, sakhaw hmun pawimawh leh mimal chenna inte chuan an tuar mek tih a tarlang. Hetianga chetna hi vantlang nun tihchhiatna ni tiin, mipuite chu insum turin a ngen. Tharum hmanga inbeihna chuan buaina a tipunlun tih tarlangin, inhriatthiam lohna awmte chu inbiakna hmanga titawp turin a ngen bawk a ni.