Manipur : Ukhrul-Imphal kawnga Naga passenger rukbote chhuah zalen

Manipur-a Ukhrul-Imphal kawnga Mongkot Chephu bula Kuki volunteer nia rinhlelhten Naga passenger 21 an rukbote chu Ningani khan police kutah an hlan tih official-te chuan an sawi. An mi rukbote hi chhuah zalen ni tawh mah se, an lirthei leh mobile phone-te erawh hren zui a la ni.

Passenger an rukbo zingah hian hmeichhia panga an tel a, an lirthei chuanna pahnihte chu lo ti dingin Ukhrul district-a Kuki khua Mongkot Chephu-ah hruai an ni. Remna leh muanna ṭha zawk a awm theihna turin an mi hrente chu Ningani zing khan Ukhrul district-a Superintendent of Police hnenah hlan an ni tih official-te chuan an sawi.

Chief minister Yumnam Khemchand Singh-a'n Litan Police Station hnuai Ukhrul-Imphal kawnga civil mi an rukbote him leh rang taka chhuah tura ngenna a siam hnuah chhuah an ni. CM chuan dan kalha pawikhawihnaa mawhphurtute chu na taka hrem an ni dawn tih sawiin, tharum hmanga inbeihna thleng ṭhin titawp turin a chah.

Kuki khawtlang aiawh, Shangai Village Authority chuan thuchhuah hran siamin, Naga civil mite chu silai keng Naga volunteer-te'n lo neihna hmuna silai an hmeh puah hnuah hren an nih thu an sawi.