Manipur : Kuki mi leh sa pahnih thihna chhuichian phut

Manipur-a Kuki pawl aiawh civil society organization-te chuan Ukhrul district-a Kuki mi leh sa pahnih thah an ni chu an dem tih sawiin, he pawikhawihna thleng hi rang taka chhui chian an phut.

Kuki Inpi Manipur (KIM) leh Kuki Organisation for Human Rights Trust (KOHUR)-te chuan an thuchhuahah Thawai Kuki khuaa cheng Thenkhongin Baite (45) leh Thangboimang Lunkim (35) te thih dan chu lungawi thlak loh an tih thu sawiin, khaw danga cheng Letginthang Haokip (29) pawhin hliam a tuar avangin enkawl mek a ni tih an tarlang.

KIM chuan heng mi pathumte hi March 11 khan National Socialist Council of Nagalim (Isak‐Muivah) (NSCN-IM) cadre nia rinhlelhten an man tih sawiin, a hnuah Baite leh Lunkim-te hi thia hmuh an ni a, Haokip hian hliam a tuar thung. An pawl chuan he thil thleng hi pawi an tih thu sawiin, dik taka chhui chian an phut a ni. Pawikhawihnaa inhnamhnawihte hrechhuak a, dan anga hma la turin an ngen a, National Investigation Agency (NIA) chhui chian tir an phut bawk a ni.

Kuki Organization for Human Rights Trust pawhin he thil thleng hi na takin an dem tih tarlangin, tui supply system siamṭha tura khawtlang tana hna an thawh laiin rukbo an nih thu leh, a hnuah thah an nih thu an sawi. An pawl chuan he pawikhawihnaa inhnamhnawihte hrechhuak a, man nghal turin thuneitute an ngen. Anni bakah Kangpokpi district-a Committee on Tribal Unity (CoTU) pawhin sorkar chu rang taka hma la turin an ngen bawk.