Assam : Union Home Minister-in hmasawnna project hrang hrang a hawng

Union home minister Amit Shah chuan nimin Pathianni khan Guwahati-ah hmasawnna project hrang hrang Rs vbc 2090 chuang senna a hawn bakah lungphum a phum. Amit Shah hian Guwahati-a Pragjyotishpur Medical College and Hospital bakah, Golaghat leh Tinsukia-a Cancer Care Centre a hawng a ni.

Union Home Minister hian virtual-in Diphu Medical College and Hospital, Jorhat Medical College and Hospital leh Barpeta Medical College and Hospital, Guwahati-a Abhayapuri District Hospital leh Swastha Bhawan-a Super speciality Hospital sakna tur lungphum a phum a, Guwahati-ah Bharatiya Janata Yuva Morcha (BJYM) hmaah thu a sawi bawk. Shah chuan Assam chu kum 10 chhungin hmarchhak bialah healthcare lamah a ṭhang chak hle tih sawiin, inenkawl tura state pawn lam kal ngai a titlem tawh tih a sawi.

Shah chuan Assam chu ram chhunga public healthcare system chhunga proton therapy machine hmang hmasa ber a nih thu leh, cancer enkawlna facility changkang leh changtlung zawk an hmang tawh tih a tarlang. Chief minister Himanta Biswa Sarma pawhin he hunah hian state-ah medical college 15 a awm mek tih sawiin, damdawi-in 10 dang chu Rs vbc 6,000 senga sak mek a nih thu a sawi. Kum 2030-ah chuan district tinah medical college sak tum a nih thu a sawi bawk.