Manipur : Police-ten KCP cadre pariat an man

Manipur-a central leh state force ṭangkawp chuan Kangleipak Communist Party (KCP) cadre pariat an man a, an kut aṭang hian dan loa sum an khawn Rs nuai 39 an man tel bawk tih official-te chuan nimin Pathianni khan an tarlang. Sum an mansak hi state enkawl damdawi-ina contract-a thawk nurse-te an chhuhsak aṭanga an neih a ni.

Nurse-te hian sum chhuhsak an nih chungchanga Imphal East district-a Porompat Police Station-ah First Information Report (FIR) an theh luh bawhzuiin, police-te hian he thila inhnamhnawihte hi an man a ni. He pawikhawihnaa inhnamhnawih midang pali pawh police-te hian March 13 khan an lo man tawh bawk a, an kut aṭang hian Rs nuai 39, mobile phone paruk leh pistol pakhat an man sak.

Investigator-te chuan an mi mante hian Jawaharlal Nehru Institute of Medical Sciences (JNIMS) staff-te sum an chhuhsak hi underground, KCP tan an transfer nghal niin an sawi.