Meghalaya : Rial tlain a tihchhiat endik

Meghalaya chief minister Conrad K Sangma chuan nimin, March 15 khan high-level review meeting kaihruaiin, state hmun hrang hranga rial tlain chenna in a tihchhiat endikna hun an nei. Meeting hi video conference hmanga neih niin, Chief Secretary, Revenue and Disaster Management Commissioner leh Secretary bakah district hrang hranga Deputy Commisioner-te an tel a, harsatna tawkte dinhmun leh chhawmdawlna pek dan tur an sawi ho a ni.

Meghalaya-ah hian Inrinni zan khan thlipui leh rial nasa takin a thawk a, rial tla hian chenna in, motor leh thlai chin tam tak a tichhia a ni. Minute 20 chhung vel rial hi tla a, ṭhenkhat chu golf ball tiatte an ni. Rangva inchung tam tak a deng pawp a, kawngsira motor park-te pawh an chhe nual bawk.

CM Sangma chuan official-te chu an dinhmun uluk taka thlithlai turin a hriattir a, rial tlain chenna in a tihchhiatte chu rang zawka chhawmdawlna leh ṭanpuina pe turin a chah a, nitin mamawh bungrua a tihchhiatte pawh siamṭha thuai turin a hriattir. Chief Minister hian thlipui leh rial tla nasain district hrang hranga chenna in a tihchhiatte thawmṭhatna atan chhawmdawlna pek turte pawh huang zauh a ni dawn tih a sawi.

West Garo Hills-ah dan loa brick siam khap

Meghalaya-a West Garo Hills district thuneitute chuan March 14 khan dan loa brick siam an khap. Brick siamna hmunte hian boruak a tih bawlhhlawh bakah hnathawkte leh mipui hriselna atan a him lo tih an tarlang. Thupek hi district magistrate Vibhor Aggarwal chuan Section 163 of the Bharatiya Nagarik Suraksha Sanhita (BNSS), 2023 hmangin a tichhuak a, National Green Tribunal (NGT) in a hriattir anga kalpui a nih thu a sawi.

Aggarwal chuan district-a brick siamna hmun tam tak chu dan loa kalpui a ni a, hnathawkte hriselna atan a him loh bakah boruak a tichhia tih a sawi. Khapna thupek chu district hrang hrangah hman nghal a ni.