US, UK leh Israel-in hmarchhak state tlawh tumte fimkhur turin chah

United States, Israel, United Kingdom leh ram dang ṭhenkhat chuan hmarchhak state hrang hranga Citizenship (Amendment) Act (CAA) duh lohna lantira nawrh huaihawt chhunzawm zel an nih avangin an ram mi leh sa, hmarchhak bial tlawh tumte chu fimkhur turin a chah. 

US sorkar chuan an offi­cial-te chu Assam tlawh rih lo turin a ti a, hmarchhak state hrang hranga US mi leh sa awmte pawh fimkhur turin a ti. New Delh-a US embassy chuan hemi chungchangah hian thuchhuah, 'Travel Alert for US Citizens : Protests in Northeastern States' tih chu a tichhuak a ni. Hmarchhak biala zin mek, America mite chu boruak awmdan hre chiang tura  US Department of State-a Bureau of Consular Affairs website tlawh fo turin a chah bawk a ni. 

UK sorkar pawhin an ram mi, hmarchhak biala awm leh zin mekte chu fimkhur turin a chah bawk a, boruak awmdan thlithlai reng tur leh, tualchhung chanchinbua thuchhuahte ngaihven reng tur te, tualchhung thuneitute thuchhuahte zawm turtein a chah bawk. 

Canada leh Israel sorkar pawhin an mite fimkhur tura chahna thuchhuah hi an siam bawk a ni. Israel chuan hmar­chhak bialah buaina nasa zawk a chhuah hlauhthawnawm a nih thu sawiin, zin tumte pawh kal rih lo turin a ti.