Majuli project atan Cheng vbch 207 ruahman a ni : DoNER Minister

Union Minister of State (Independent Charge) for Development of North Eastern Region (DoNER) Dr Jitendra Singh chuan, Assam-a world heritage island “Majuli” venhim nan leh tih changtlunna turin cheng vaibelchhe 207 ruahman a nih thu Thawhlehni khan a puang.

DoNER minister Dr Jitendra Singh chuan, Majuli chu ram chhung mai ni lo khawvel huapa mite hriat hlawh chho mek a ni tih sawiin, khawvela 'River Island' lian berah puan a nih hnuin mite ngaihven a hlawh zual a ni. DoNER Ministry chuan Majuli venhim leh tihhmasawn a ngai pawimawh hle a, hemi atan hian project kalpui turin ruahmanna siam a ni, a ti. Majuli-ah hian leilung luangral a nasa em em a, tunhnai kum reilote chhungin a ram zau zawng chu km 80 vel laiin a hloh tawh a ni. Hemi veng tur leh titawp tur hian DoNER Ministry chuan hma a la thuai dawn tih Dr. Singh chuan a sawi.

Thawhlehni khan North Eastern Council (NEC) headquarters Shillong-ah meeting neih a ni a, he hunah hian video conference-in Dr Jitendra Singh chuan thu a sawi. Minister chuan, sorkar kum kal mekah hmarchhak huam chhunga hmasawnna hna thawhna turin, DoNER Ministry hnuaiah cheng vaibelchhe 2400 ruahman a nih thu sawiin, thla kaw chhungin cheng vaibelchhe 1743 hman a ni tawh tih a sawi. North Eastern Council (NEC) chuan sorkar kum kal mekah cheng vaibelchhe 702 a hmang ral tawh tih sawiin, sorkar kum kal ta chhunga sum hman ral chu cheng vaibelchhe 760 a nih thu a sawi.

Kum 2016-17 chhungin hmar-chhak hmun hrang hrangah DoNER Ministry chuan project 99 a zo fel tawh a, heng zinga 76 chu NLCPR scheme hnuaia thawh niin, project 23 chu North-Eastern Council hnuaia thawh a ni. Project-ah hian inkawlpawhna kawngpui, tui lak, zirna lam hawi leh thil dang eng emaw zat a tel. Meeting-ah hian DoNER Secretary Naveen Verma, NEC Secretary Shri Ram Muivah leh senior officer ṭhahnem tak an tel a ni.