Manipur : Sorkar laipuiin Paramilitary Force 4000 tirh belh

Sorkar laipui chuan Manipur tualchhung buaina chingfel tur leh, National Higway dan chah tihtawp a nih theihna turin venhim hna thawktu paramilitary force 4,000 a tirh luh belh.

Home Ministry official chuan, Manipur-ah hian kar kalta chhung khan paramilitary force 1,500 tirh belh an nih thu sawiin, a awmsate nen 2,500 an tling tawh tih Thawhlehni khan a sawi. Mahse tualchhung buainain ziaawm lam a la pan theih loh avang leh boruak a so san zel avangin, paramilitary force 4,000 tirh luh belh an ni leh ta tih a tarlang. Union Naga Council (UNC) te chuan Manipur sorkarin Jiribam leh Sadar Hills-te, district-a hlangkai tura sorkar hmalak duh lohna lantira November 1 aṭanga National Highway kawngpui pawimawh pahnih an dan chah chu an la kalpui reng a ni.

NH-2 (Imphal-Dimapur) leh NH 37 (Imphal-Jiribam) dan chah a nih avang hian nunphung a buai phah hle a, tualchhung buaina a chhuah phah hial a ni. Pawl hrang hrangten nawrh an huaihawt a, lirthei hal leh Biak-In suasam thlengin a hluar chho a ni. Imphal East district-ah chuan lirthei 20 chuang hal a nih vangin curfew puan a ni a, Imphal District-ah hian tun dinhmunah dan leh thupek khauh taka kalpui a la ni a, boruak a muanawm chhoh avangin Thawhlehni zing aṭang khan curfew chu darkar kaw chhung tihtawp lailawk a ni. Indo-Myanmar border-a Moreh-ah pawh bomb a puak nia tarlan a ni bawk.

Nagaland Chief Minister TR Zeliang chuan Manipur tualchhung buaina chingfel turin sorkar laipui chu inrawlh turin a lo ngen tawh a, Manipur sorkar chu Imphal valley-a Naga mipuite himna ngaihtuahsak turin a ngen bawk. Zeliang chuan Union Home Minister Rajnath Singh leh Manipur Chief Minister Ibobi Singh-te chu Thawhṭanni khan lehkha thawnin, buaina chingfel tura chak zawka hma la tura ngenna a ziak a ni. Nagaland Lok Sabha MP Neiphiu Rio pawhin Manipur buaina chu chinfel thuai a duh thu sawiin, pawisawilo civil mite chunga tawrhna thleng chu pawi a tih thu a sawi.

December 15 khan venhim hna thawktu state police-te chu Lokchao leh Bongyang-ah te lambun an ni a, mi pathum an thih bakah midang 14 ten hliam an tuar. Hemi chungchangah hian chief minister kaihhruainain cabinet meeting neih nghal a ni a, thi chhungte hnenah chang nuai 15 ṭheuh pek cabinet chuan a remti a ni.

Hetih lai hian UNC-te chuan Presidents Rule puan an phut thu an au chhuahpui leh mek. Meitei leh Naga-te inkara buaina chuan zual lam a pan zel tih sawiin, Ibobi Singh-a kaihhruai sorkarin district thar pasarih din tura thutlukna a siam chuan buaina nasa zawk a chawk chhuak niin an sawi. Buaina chungchangah hian UNC palai te chuan Union Home Minister Rajnath Singh hmu turin Thawh­lehni khan Delhi an pan a, MoS Home Kiren Rijiju hmuh an tum bawk.