US-in DPAA 'Mission in India' zo fel

U.S. Defense POW/MIA Accoun-ting Agency (DPAA) chuan indopui pahnihna hun laia an ralthuam hman te leh sipai thi tate ruang zawn hna a kalpui chu a zo fel ta.

U.S. Ambassador to India Richard Verma chuan, US sorkar chuan indopui pahnihna hunlaia sipai thi tate ruang zawn hna a kalpui chhunga India sorkar nen thawhdunna ṭha tak an nei chu lawmawm a tih thu a sawi. 'DPAA Mission in India' kalpui a nih chhungin sorkar laipui leh state sorkar-te'n an thawhpui
ṭhat thu sawiin, zawhfel a ni thei ta chu a lawmawm hle a ni, a ti. Mission commander Lt Col Pritz pawhin, Ministry of External Affairs, Arunachal Pradesh sorkar leh Indian Air Force-te inpekna ropui a tih thu a sawiin, anni puihna zarah mission kalpui thei an nih thu a sawi.

Mission kalpui a nih chhung hian indopui pahnih hun laia thlawhtheihna che sual leh, chhan hrang hrang vanga sipai thite ruang zawn hna thawh a ni. Arunachal hmun hrang hrangah thlawhtheihna tla them te, ralthuam hlui leh sipai thite ruang zawn hna hi kalpui a ni a, henga an thil hmuhchhuahte hi DPAA Laboratory-ah endik a, zirchian a ni dawn a ni.

AP-ah hian indopui pahnihna hunlaia mi ni ngeia hriat, thlawh-theihna them te, laipui leh ralthuam hlui eng emaw zat hmuhchhuah a lo ni tawh a, kuminah ngei pawh Japan siam laipui hlui tawh tak hmuhchhuah a lo ni tawh a ni.