Nagaland, Meghalaya leh Manipur lawyer-ten CAA khing dawn
Meghalaya, Nagaland leh Manipur-a law-yer-te chuan Supreme Court-ah Citizenship (Amendment) Act, 2019 khinna thehluh an tum. Shillong-a press conference an neihah, lawyer Peter A Dohkrud chuan CAA chu India Danpui kalh a ni a, Constitution Article 14,15 leh 21 bawhchhiatna a nih avangin Supreme Court-ah he dan hi an khing let dawn tih a sawi. Hemi rual hian India Constitution venghimtu, Supreme Court chungah chuan rinna an nghah thu a sawi bawk.
Court-ah PIL an thehluh turah mipuite thlawpna leh ṭawngṭaipuina dilin, Dohkrud chuan hmarchhak bial aṭanga political leader, Parliament-a CAB thlawptute a dem thu a sawi nghal bawk. Meghalaya Governor bang turin phut Lawyer team chuan Meghalaya Governor Tathagata Roy chu CAB dodaltute chungchanga a thusawi danah an dem thu sawiin, bang turin an phut bawk.
Governor Tathagata Roy hian "CAB duh lote chu North Korea-ah kal mai rawh se" tiin a sawi a, a thusawi avang hian ngaidam dil tur leh bang tura an phut thu an sawi. Governor thusawi chu Meghalaya mipuite chauh ni lo, hmarchhak puma an unaute hmusitna leh deusawhna a ni, an ti. Governor chu a dinhmun hrechiang tura an duh thu te, sorkar policy ni loin Constitution humhimtu tur zawk a ni tihte inhrechiang turin an duh tih an sawi a, a thusawi chu Governor thusawi dan tur a ni lo, an ti. Hei vang hian Governor a nihna aṭanga bang a, politics khel ve mai turin an ti a ni.