Assam : OIL in mipuite hnenah ngen

Citizenship (Amendment) Act (CAA) duh lohna lantir vanga Assam-a buaina chhuak chuan Oil India Limited (OIL) a nghawng tel avangin, OIL chuan harsatna lian zawk a thlen lohna turin an hna thawh phalsak turin mipuite a ngen. 

Thuchhuah a siamah, OIL chuan nawrh huaihawt vanga hna thawk thei loa an awm zel chuan state economy leh mi nawlpui nunphung  thlengin a nghawng thei dawn tih a sawi. "Nawrh huaihawt vang hian crude oil leh natural gas siamchhuah zat a tlakhniam bakah, OIL hnathawh tihtawp hian refinery hrang hranga LPG leh crude oil supply thlengin a nghawng tawh a ni," a ti. 

OIL leh  Oil and Natural Gas Cor­poration (ONGC) chuan Pathianni khan gas an siamchhuah chu tihtawp a nih bakah, oil siamchhuah zat chu nawrh huaihawt aṭang khan 75% in a tlahniam tawh tih a sawi. OIL in nikhata crude oil ton 9,000 a siamchhuah ṭhin chu CAA vanga buaina a chhuah hnuah ni khatah ton 1000 chauh a siamchhuak thei rih a ni. Hei bakah hian state chhunga oil leh  natural gas a siamna 400 vel zinga 50 chauh an hmang thei bawk. 

Digboi refinery-a ni khata crude oil suppy, ton 8000 chu ton 1800 ah tihhniam a ni a, Numligarh refinery-a supply phei chu tihtawp a ni rih. 

OIL official chuan CAA dodalte nawrh huaihawtin an hnathawh a nghawng vang hian NEEPCO, Namrup Ther­mal, BCPL leh Assam Gas Company hnenah pawh gas an pe thei rih lo tih a sawi. LPG cylinder leh tanker-te chu OIL terminal-ah awm mah se, a phurtu motor te dan an nih avangin lakchhuah theih an ni lo tih a sawi.