Manipur : UNC in census neih tur dodal

United Naga Council (UNC) chuan April 1 aṭanga Manipur-a chhiarpui, census neih tur chu an duh loh thu sawiin chief minister hnenah memorandum an theh lut.

UNC chuan chhiarpui neih a nih hma hian dan loa pem lutte chu National Register of Citizens (NRC) kaltlangin emaw, hetiang lam hawi thil dangin emaw dap chhuah an ni phawt tur a ni, an ti. Hei hi khua leh tui dik takte chauh chhiarpui neih turah an tel theihna atan a ṭul tih an tarlang.

Khua leh tui dik tak ni lo, dan loa pem lutte finfiah loa chhiarpui neih chu chhiarpui neih turin a tum ber ngaih pawimawh lohna nia an ngaih thu sawiin, mihring awm zat leh dinhmun thlengin a dik tawk lo thei dawn a ni, an ti.

State chhung hnam leh hnam inkara buaina chhuak chuan ziaawm lam pan mah se boruak a la pangngai lo a, mi tam takin an in leh lo an la tlanchhiatsan bawk a, hei vang hian hetiang dinhmuna chhiarpui kalpui chuan hnam hrang hrang zinga rinhlelhna pawh a thlen thei dawn niin an sawi.

Thawhlehni khan Imphal East district-a Porompat-ah Manipur-a chhiarpui neih tur chu kalpui rih lo tura phutin Campaign for Just and Fair Delimitation (JFD) hmingin nawrh huaihawt a ni bawk. Pungkhawmte chuan an state-a dan leh thupek dinhmun thlirin, chhiarpui neih tur hi sawn hla tura an duh thu an sawi. Dan loa pem lutte dap chhuah an nih a, state chhung boruak a pangngai hma chu chhiarpui neih hi kalpui rih loh an duh tih an tarlang.

JFD convernor Jeetendra Ningomba chuan tuna an state dinhmun en chuan chhiarpui hi dik leh fal taka kalpui a har dawn tih a sawi a, Meitei leh Zo/Kuki buaian chu chinfel a la ni lo a, tun haniah Naga leh Kuki hnam inkara inhriatthiam lohna a awm leh bawk tih a sawi. Relief camp-a khawsa tam tak an la awm bawk a, hetichunga chhiarpui neih tum chuan buaina a belhchhah zawk dawn niin an sawi. Thawhṭanni khan chhiarpui neih tur duh loin hmeichhe rualten legislative assembly panin kawng an lo zawh tawh bawk a ni.