Assam : BJP-in candidate list hmasa ber tlangzarh

Assam-a Bharatiya Janata Party (BJP) chuan assembly inthlan lo awm tura candidate list hmasa ber a tlangzarh a, list-ah hian candidate 88 tarlan an ni a, list dang pawh tihchhuah leh thuai an tum. Candidate list hi Nilaini zan khan BJP Central Election Committee meeting-ah tihfel a ni a, he hunah hian prime minister Narendra Modi, home minister Amit Shah, defence minister Rajnath Singh bakah BJP pll body member-te an tel.

Chief minister Himanta Biswa Sarma chu Jalukbari assembly bialah a vawi rukna atan a in candidate leh dawn. Jalukbari-ah hian Sarma hi kum 2001, 2006, 2011, 2016 leh 2021-ahte hnehna a lo chang tawh a ni.

List tihchhuahah hian CM Sarma bakah, Congress aṭanga BJP-a inlet Pradyut Bordoloi leh Bhupen Borah-te hming pawh tarlan an ni. Bordoloi hi Guwahati Lok Sabha hnuaia awm, Dispur bialah a ding dawn a ni. Borah pawh hi assembly inthlan lo awm turah hian inthlan hmasa pahniha BJP lakah vawi hnih a chak lohna, Bihpuria seat a ding dawn a, tun ṭumah chuan BJP hming a chuh dawn ta thung. BJP hruaitu pawimawh zingah Pijush Hazarika, Rupali Langthasa leh Prasanta Phukan-te pawh candidate list-ah an tel.

Member 126 awmna Assam assembly inthlan hi April 9-ah neih a ni ang. Inthlan hnuhnung berah khan BJP kaihhruai NDA chuan seat 75 neiin, Congress kaihhruai Mahajot alliance chuan seat 60 a nei bawk.