Meghalaya : Thlipui leh rial tlain mi 48,000 chuang nghawng

Meghalaya state-a March 13 aṭanga thlipui na tak tleh leh rial tla chuan state hmun tam zawk a nuai tawh a, chenna in sang chuang a tihchhiat tawh bakah mi sang telin harsatna an tawk niin official data chuan a tarlang. State Disaster Management Authority-in preliminary report a tihchhuahah, khaw hrang hrang 745 aṭangin mi 48,490 a nghawng tawh tih tarlan a ni.

Thlipui tleh leh rial tla hian East Khasi Hills, West Khasi Hills, Ri Bhoi, South West Khasi Hills, East Jaintia Hills-a district hrang hranga block 30 a nghawng a, Garo Hills huam chhunga district hrang hrangah chhiatna nasa tak a thleng tawh bawk. Thuneitute chuan chenna in 13,076 a tichhe tawh tih tarlangin, mi pakhat a thi tawh a, inhliam an awm bawk.

Infrastructure-te pawh a chhe nasa hle bawk a, hetih lai hian thlai tihchhiat report erawh a awm tam lo a, lo neihna ram hectare 0.4 chauh a nghawng nia sawi a ni. Report hi March 17 zan dar 9 thlenga district hrang hrang data an dawn aṭanga siam niin, harsatna a thlen dan report a la luh belh zel bawk a ni. Official-te chuan endikna neih mek a nih thu leh thuthar awmte an puan belh zel tur thu an sawi.