Nagaland : Sorkarin lirtheia phalna nei loa chhinchhiahna dah khap

Nagaland sorkar chuan sorkar leh mimal lirthei zawng zawngte chu ni 45 chhungin registration plate-a phalna nei loa flag, emblem, hming, symbol, sticker, seal leh logo dah telte paih vek turin a hriattir a, thupek zawm lote chungah khauh taka hma lak a nih tur thu a puang.

He thupek hi Transport commissioner leh secretary, Robert Longchari-a'n Ministry of Road Transport and Highways-in Central Motor Vehicles Rules, 1989 Rule 50 leh Rule 51 khauh taka kalpui tura a hriattirna behchhanin a tichhuak a ni. Rule 50-ah hian High-Security Registration Plate (HSRP) hman a nih dan tur thu tarlan a ni a, Rule 51-ah chuan number plate-a letter leh number awmte dimension leh color scheme ruat sa a tarlang a ni.

State sorkar chuan he hmalakna hi Ministry of Road Transport and Highways-in kum kalta November 7-a thupek a tihchhuah zawmna a ni tih sawiin, khauh taka kalpui a ni dawn tih a tarlang. Lirthei neitu zawng zawngte chuan hun tiam chhungin thupek hi an zawm tur a ni a, dan zawm lote chu na taka hrem an ni dawng tih a tarlang.