Private institution-ten infrastructure quality ṭha an nei tur a ni : Arunachal Governor

Arunachal Pradesh governor K.T. Parnaik chuan Ningani khan private institution-ten infrastructure neih tura ruahmanna siam chu dik takin an zawm a ṭul tih sawiin, zirlaite tana zirna boruak ṭha a awm theihnan facility mamawh ang quality ṭha an nei tur a ni, a ti.

He thu hi state khawpui, Itanagar-a Lok Bhavan-a Arunachal Pradesh Private Educational Institutions Regulatory Commission (APPEIRC)-te nen meeting an neihah a sawi. Governor chuan zirna kawngah dan khauh tak neih a pawimawh thu sawiin, commission chu admission chungchangah langtlang leh a thiam leh tlingte lak an nih theihnan uluk taka thlithlai turin a chah. Hei bakah commission chu institution rintlak leh zirna lama dikna vawng nung tura exam leh research standard-te uluk taka enfiah turin a ngen bawk.

Private insitution-te chu infrastructure quality ṭha nei turin a hriattir a, zirna lama hlawhtlinna ngelnghet a awm theihnan commission chu University Grants Commission leh state sorkar inkaihhruaina dan hmang turin a chah bawk. Commission chu zirna in kalpui dan endik fo tura hrilhin, dan zawm lote laka hremna pek leh zirna in khar thlenga kalpui a ni ang, a ti. Hetiang zawng hma an la a nih chuan state higher education-ah hmasawnna a awm dawn tih a sawi.