Tripura : Agartala Smart City Mission hnuaia project zo fel

Tripura chief minister Manik Saha chuan Ningania assembly rorel inkhawmah, Agartala Smart City Mission hnuaia project 65 chu hun bituk chhung kum kalta June 30 khan zawhfel vek a nih thu a sawi. Agartala Smart City Limited (ASCL) hnuaia project chu kum 2016, November 18 khan ṭan a nih thu sawiin, project 65-te chu hlawhtling taka peihfel an ni tih a tarlang.

Smart City Mission chu ruahman anga zawh fel a ni tawh a, Asian Development Bank (ADB) fund hmanga Smart Road project dang pawh thawh mek a ni tih Urban Development enkawltu ni bawk Chief Minister chuan a sawi. State sorkarin sorkar laipui aṭanga Rs vbc 465 a dawn chu hman zawh tawh a ni bawk. Official financial record chuan, sum hman zawng zawng hi Rs vbc 541.04 niin, sorkar laipui aṭangin Rs vbc 465, state aṭangin Rs vbc 51.04, leh Administrative and Other Expenses (A&OE)-a hman tur Rs vbc 25 a huam a ni.

CM Saha chuan assembly-ah hian infrastructure lama an hmasawnna sawilangin, Panchabati-Battala kawng chu Rs vbc 75.95 in kum 2022 July 15-ah siam ṭan a ni a, kumin June thlaa zawhfel tura ruahman a nih thu a sawi. Khawpui bawlhhlawh sawngbawl chungchangah bawlhhlawh 55-60% chu leiṭhaa siam a nih thu leh, mipui hnena an hralh bakah loneitute hnenah sem chhuah a ni tih a sawi bawk.