SIR bulṭanna state-ah kalpui a ni: Tripura CM

Tripura chief minister Manik Saha chuan March 21 khan electoral roll ennawnna, Special Intensive Revision (SIR) chu state-ah a bulṭanna kalpui a ni tawh tih a sawi. BJP-in workshop an buatsaiha a tel zawha thuthar lakhawmtute a kawmnaah, CM Saha chuan SIR kalpui chungchangah mipuite chu chiai lo turin a chah nghal bawk.

Saha chuan Election Commission-in state hrang hrangah SIR an kalpui a, hei hi voter dik takte hmaih an awm lohna atan tih a ni, a ti. State-ah chuan hriattirna tihchhuah a nih hmain official-te chuan SIR hi an kalpui ṭan tawh tih a sawi. Workshop hi Saheed Bhagat Singh Youth Hostel-ah neih niin, BJP national general secretary Tarun Chugh leh MP hlui Vinid Sonkar bakah state minister-te leh party hruaitute an tel a ni.

Workshop-ah hian SIR kalpui a nih chhunga party-in voter-te an puih theihna tur sawi ho a nih thu sawiin, electoral roll-ah hian dik taka kalpui a nih theihna atan theihtawp an chhuah dawn tih Saha chuan a sawi. "Tripura hi hmun thum aṭangin Bangladesh-in a hual a,vote nei thei zawng zawngte chu an dikna chanvo an hman theihna hun remchang siamsak tum a ni," a ti.

State-a private university din phalsak chungchangah eptu party-zawhna chhangin, CM chuan state te zawk Sikkim pawhin university 23 an nei tih a sawi. Sikkim-ah hian mipui nuai riat vel an cheng a, university 23 an nei tih sawiin, state-a university din belh theih lohna tur a awm lo tih a sawi. University thar din a nih chuan state pawn aṭangin zirlaiten an pan dawn tih sawiin, economy ṭhanlenna kawngah a pui dawn a ni, a ti.