Manipur: CM leh Kuki-Zo Council-in meeting nei

Manipur-a hnam leh hnam inkara buaina a chhuah aṭanga kum thum dawn a liam hnuah, Kuki-Zo Council (KZC) leh chief minister Yumnam Khemchand Singh chuan a vawi khatna atan inbiakna an nei. Meeting hi March 21 khan Assam, Guwahati-ah neih niin, darkar khat leh minute 45 vel a awh a ni.

Inbiaknaah hian KZC aiawhte chuan thu pawimawh eng emaw zat sawilangin, chung zingah chuan Kuki leh Tangkhul community inkara buaina chhuak tihziaawm a ṭul thu leh, remna leh muanna awmze nei zawka kalpui a nih theihna turin a tuartute dikna chanvo pek an phut thute pawh an sawi tel. Council chuan politics lama inremna a awm hma chuan buffer zone zahawmna humhim a pawimawh thu an sawi bawk. Helai biala remna leh muanna ngelnghet a awm theihna turin Suspension of Operations (SoO) chu chak zawka kalpui turin an ngen.

Chief Minister chuan remna leh muanna awm theihna tura sorkar hmalakna hrang hrangte lo hrilhin, hun harsa tak kara inbiakna nei tura KZC hmalakna chu lawmawm a tih thu a sawi. Meeting hi thutlukna mumal leh inremna siam loin tihtawp a ni.