Meghalaya: Sikul 86% te zuk leh hmuamah fihlim

Meghalaya chu ram chhunga zuk leh hmuam fihlimna sikul awm tamna ber niin, zirna in 86% chuan Tobacco Free Educational Institutions (ToFEI) criteria an tlin tih state official-te chuan an sawi.

Global Adult Tobacco Survey, kum 2017-ah tihchhuahah khan Meghalaya state-ah hian kum tin zuk leh hmuam vanga thi 8,000 vel an awm a, kum 15 chunglam zingah 47% chu zuk leh hmuamah an fihlim lo tih a tarlang.

Kum thum liamta khan National Health Mission hnuaiah zu leh hmuam dona atan programme kalpui a ni a, sikul lam chu thlurbing bik a ni. State-a health leh education department chuan Sambandh Health Foundation nen ṭangkawpin an kalpui a, he programme hi Meghalaya puma sikul zawng zawng huam tir vek an tum.

Ministry of Health and Family Welfare-in kaihhruaina a tihchhuah angin, sikulte chuan kum tin zuk leh hmuam dona kawng pakua an kalpui tur a ni a, hei mark 100 scorecard hmanga teh a ni. Zirna in mark 80 aia tlem lo hmute chu zuk leh hmuam fihlim an ni tih hriatpuina pek an ni. Zuk leh hmuam do kawngah hian anti-tobacco chhinchhiahna dah, awareness campaign leh zirlai kaihhruai kawngzawh buatsaih, campus chhunga zuk leh hmuam dona dan zawm tura tih an ni. Official-te chuan kumtin sikul naupang 10,000 vel chu kawngzawh leh signature campaign-ah an tel tih an sawi.

State ToFEI nodal officer, Jennyfer Jones Synrem chuan he hmasawnna hi naupangte tana hriselna lam inzirtirna pawimawh tak a nih thu sawiin, zuk leh hmuam awm lohna siam tura state hmathlir tichaktu a ni tih a sawi. Sorkar, sikul leh khawtlang thawh hona chuan inthlakdanglamna a siam thei tih a sawi bawk.