Nagaland: Governor-in health infrastructure leh programme pawimawh endik

Nagaland governor atana ruat thar Nand Kishore Yadav chuan Naga Bhavan conference hall, Lok Bhavan, Kohima-a Health & Family Welfare Department official-te a kawmnaah state health infrastructure a endik. Meeting-ah hian department chuan PowerPoint presentation hmangin state-a socio-demographic profile, health infrastructure leh health sector-a hlawhtlinna an neih hrang hrang an pholang.

Official-te chuan state-ah hian health indicator lian tham siamṭhat kawngah hmasawnna a awm thu Governor hi an hrilh a ni. Nau piang thi zat nasa takin a tlahniam tih sawiin, nu naupai thihna ratio leh total fertility rate-ah pawh kum tam tak chhung hmasawnna a awm tawh tih an sawi a, nu leh naupang healthcare service ṭha zawka kalpui a ni tih an tarlang. . Official-te chuan National TB Elimination Programme an kalpui dan pawh an hrilh a, TB natna hmuh chhuah leh enkawlna pek kawnga hmasawnna an neih dante an sawi bawk.

Hmasawnna tam tak a awm rualin, Ni-Kshay Poshan Yojana hnuaia a hun taka sum pek chhuah chu hmun ṭhenkhatah chu ngaihven zual a ngai tih Governor hi an hrilh. Governor chuan department-in healthcare delivery tihchangtlunna tura hmalakna a kalpuite chu lawmawm a tih thu sawiin, health programme-te ṭha zawka kalpui a nih theih nan hmun hla leh tlawhpawh harsa bakah, thingtlang lama hmalakna chu a ngaih pawimawh thu a sawi. Mitin tan healthcare quality ṭha pek chu chhunzawm zel turin a chah bawk a ni.