Assam : Assembly inthlan neih turah candidate 818 in nomination theh lut

Assam Legislative Assembly inthlan neih turah candidate 818 in nomination paper an theh lut. Nomination paper theh luh theih hun hi March 23 khan a tawp a, nimin khan enfiah niin inhnukdawh duhte tan March 26 thleng hun hawn a ni.

Chief Electoral Officer office chuan paper lutte endik mek a nih thu sawiin, candidate zat hi a la danglam thei tih a tarlang.

State khawpui, Guwahati-a assembly bial pawimawh pangaa din turin party hrang hrang aṭangin candidate 26-in nomination paper an theh lut. Bial pawimawh zingah hian Jalukbari, Guwahati Central, New Guwahati, Dispur leh Dimoria-te an tel. Jalukbari bialah hian chief minister Himanta Biswa Sarma chu BJP ticket hmangin a ding leh dawn a ni.

BJP sorkara cabinet minister nilai, Nandita Gorlosa chu inthlan awm turah BJP ticket a chan loh avangin Pathianni zan khan BJP chhuahsanin Congress party a zawm. Gorlosa hi sports and youth affairs leh welfare of minorities minister ni lai a ni a, Haflong bial aṭang thlan tlin a ni a, mahse tun ṭumah hian BJP chuan aiah Rupali Langthasa an dah a ni. Chief Minister chuan party ticket an siamah MLA nilai 18 an tel lo tih sawiin, sorkarna an siam leh a nih chuan heng ticket chang lo MLA te hi mawhphurhna pawimawh tak pek an ni dawn tho niin a tarlang.

Seat 126 awmna, Assam assembly inthlan hi April 9-ah neih a ni dawn a, May 4-ah result puan a ni ang.

VoteVibe-in mipui ngaihdan a lak hnuhnung berah, tun ṭum inthlanah hian rorellai, BJP kaihhruai National Democratic Alliance (NDA) bawk sorkar leh tura ring an tam ber. A term thumna atan NDA hian sorkarna chang lehin, seat 80-90 la pha turin an ring. INDIA bloc chu seat 29-39 vel la tura chhut an ni bawk. Survey chhangtu 49% chuan chief minister ni lai, Himanta Biswa Sarma chu CM atana an duh berah an thlang a, Congress hruaitu Gaurav Gogoi chuan dawtin 37.7% in an thlang ve bawk. An state-a dan loa pem lutte chungah Himanta kaihhruai NDA sorkar hma lak dan chu 50.6% in ṭha an tih hle thu an sawi bawk.